He maimai aroha ki a Parekura Horomia

Tuesday, 30 April 2013, 10:42 am
Press Release: Ngati Kahungunu Iwi Inc

 
HE PĀNUI MATE – 30 April 2013
He maimai aroha ki a Parekura Horomia

Hikohiko te uira,
Papā ana te whatitiri i te rangi,
Ki runga i  ngā parikārangaranga,
He aituā! He aituā! He aituā!
Kua tau te pōkēao ki runga o Tākitimu waka,
Ki runga o Te Kupenga a Te Huki,
Ki runga o Te Tairāwhiti whānui,
Auē, he roimata ke heke, he hūpē ka whiua!
Parekura, tiraha ake rā!
 
Parekura, ka rongo mōu, ka ohorere te manawa. Nei ka noho, ka ketuketu i ngā mahara me kore noa e kitea he kupu hai tangi ki a koe ka riro nei ki Paerau. Kua tau iho rā te parekawakawa o te mate ki runga o Aotearoa whānui, ko tā te motu tāna mahi, he tangi, he auē, e hika mā e.
 
Tīraha mai koe i tō rahi o Te Aitanga-ā-Hauiti, i Te Tairāwhiti nui tonu, hai whakaeketanga mā te motu, ki reira koe whakakākahungia ai ki ngā kupu whakatiketike, ki ngā kupu poroporoaki, ki ngā kupu whakarangatira. Kāre e kore, ka oioi ana ō whenua i ngā waka huhua ka pae mai ki ō takutai, ki te mihi rā ki a koe e takoto mai rā. Te matawhawhati hoki o tō matenga, e hika, kāre i matakitehia e wai ake nei, kātahi te hanga aroha!
 
Ko te aroha ake, ka riri ana te iwi Māori ki ngā mahi a te kāwanatanga, ko koe, otirā ko koutou tonu ngā kaitōrangapū Māori ēnā ka noho hai papa, ā, whiua ana koutou ki te riri, ki te tāwai, ki te whakatakē, ki te whakaparahako, ki te hahani, ki te whakahāwea i ōna wā. Ko te aroha kē ia, e Parekura, ki a koutou ngā kaitōrangapū Māori i te whare pāremata, ki a koutou tokoiti noa nei e waha ana i ngā tūmanako o te iwi Māori hai tohe i ngā whakatau a Ngāi Kiritea mā, hai whakatakoto i ngā nawe ki mua i ō rātau aroaro, me kore e tahuri mai rātau ki ngā hiahia o te iwi Māori. Ki reira koutou whakapau atu ai i ō koutou kaha katoa, ki konei ētahi whakatakē atu ai i ā koutou. Pokea ana ō koutou tuarā ki ngā wawata e hia manomano nei o te iwi Māori, ā, ka kore ana e tutuki i a koutou, nā wai i noho hoa, ka noho hoariri kē. Nā reira, ka pātai te ngākau, he aha oti tēnei mea te ‘whanaungatanga’ e kōrerotia nei e te motu? Korekore ana tērā āhua i roto i te ao tōrangapū, kāre he whanaungatanga, kāre he matemateāone, engari anō te ao Māori, kai reira tonu ā tātau tikanga, ahakoa parea ana e tātau ō tātau tuarā i ōna wā.
 
Kai te kanohi kitea, me uaua ka kore e rangona tō korenga i waenganui i ā tātau hui maha, huri noa i te motu. Ahakoa he aha te kaupapa, ka tautoko, ka tae atu. Rongonui mai, ariki mai, tūtūā mai, i reira koe. Ahakoa ko wai te tangata, ka mihia e koe. Kāre i hīkaka te ihu, kāre i parea te tuarā, mihia ana e koe te katoa. Koinei tō momo, Parekura. Ko te momo pēnā i a koe nā e kore e kitea āpōpō. Pōhara ana te ao Māori i tō ngarohanga atu, ā, mā wai oti e whai atu?
Ahakoa kāre ētahi i tino rata ki ētahi o ngā whakatau a te kāwanatanga i te wā i a koe nā, hai aha atu ērā, kia ahatia! I te mutunga iho, he Māori tāua, he whakapapa ō tāua, he tikanga ā tāua, he reo tō tāua, he ahurea tō tāua, he mana tō tāua, ko te matemateāone kai te paihere i a tāua. Waiho ake rā ko ēnei kupu itiiti noa rā hai kōpani ake i tēnei poroporoaki ki a koe, Parekura: “Kua whawhaitia e koe te whawhai pai, kua omakia e koe te oma pai”. Haere i tō tira mokemoke, e hika. Kia au te moe. 
 
Nā tō rahi o Ngāti Kahungunu.

ENDS

© Scoop Media